الاثنين، 17 نوفمبر، 2008

لا قطن و لا كتان .. الأهلي في اليابان









لأول مرة اشعر ان مصطبة شوكت تكون غير مناسبة في بعض الأحيان ... و هذا يدل الا كمال لأي حاجة في الدنيا خصوصا المصاطب ... و اللي يستغرب من كلامي علشان عارف اني بحب مصطبتي جدا و بعنز بيها يجيي معنا يسمع هذا الحوار الذي دار في المصطبة :

شوكت : مشرفينا يا جماعة.. و الله انتم بتوحشوني جامد و ربنا يعلم انا بحبكم في الله قد ايه ....

وجدي : المشاعر متبادلة بينا كلنا يا شوكت , احنا اكيد كلنا بنح.....

وفجأة ظهرت كتيبة حمراء تغزو الشارع الذي فيه مصطبتنا رافعة الأعلام و البيارق الحمراء
حسين : ايه ده مولد ده و لا ايه و لا حد مات من شيوخ الصوفية ؟؟؟

وجدي : صوفية ايه دي اعلام حمراء مش خضراء ....
شادي : هيهيهيهيه .. يبقى الثورة الحمراء قادمة

شوكت : ثورة ايه و حمراء ايه .. دول بيقوله اهلي اهلي

نادر : الحقوا يا جماعة ... ده فيه جمل في النص !!!!!!!!!!!!!!1

و رأينا حشود هائلة ترفع أعلام الأهلي و تبتهج بالنصر العظيم الذي حققه النادي الأهلي في غزوته مع النادي القطن الكاميروني و احرازه للكأس الأفريقية للمرة السادسة في تاريخه العريق .. و بالطبع قام شباب بولاق الدكرور و ارض اللواء و ناهيا و شارع السودان بالهجوم على شوارع شهاب و جامعة الدول العربية " شارع الذي حدث فيه التحرش ايام العيد " و قاموا بالهتاف و تعطيل المرور و رفع الأعلاف و الغناء و الرقص و في مقدمتهم جمل لورق و خلفهم المئات من السيارات ترفع الأعلام و ترفع الكلاكسات و كأننا حققنا النصر عاى الصهاينة
و اتى الشباب ناحية بيت الكابت حسن شحاته " بيته بجوار المصطبة " تهتف للأهلي و تهتف ضد الزمالك و الأهلوية اهم عزيمو و امل و قوة و مش عارف ايه و اديها تريقة و غيظ للكابتن حسن شحاته

و من هذه المواقف احسست بمدى الكبت الذي يعاني منه الشعب المصري

وانه يا ولداه مش لاقي فرصة يفرح الا في هذه المناسبات

و لذلك لم اضيع الفرصة و نزلت و سيبت المصطبة

و قعدت اصور

هههههههههههههههههههه

ملحوظ : رجال الشرطة بمختلف الرتب كانوا متواجدين في شارع جامعة الدول العربية و لم يحركوا ساكنا على الرغم من تعطيل المرور و لم يقل احد ان اللي بيحصل ده غلط
بس فرحانين يتشطروا على بتوع المظاهرات و يقولوا انها بتعطل المرور
فعلا شعب انما ايه .. مستاهل الحرررررررررررر........

و مش حارمكم من الصور و مقاطع الفيديو




video

13 قالوا رايهم:

نهر الحب يقول...

زى ما انت قلت
ان الشعب بيدور على اى فرصة يبفرح فيها ويخرج الكبت فى اى شئ المهم انه مينفجريش
اما شعب يستاهل الحررررررررررر
اكيد يستاهل الحررررررررررية

مبروك للاهلى
ويارب يكسب فى اليابان

المستنصر بالله يقول...

مبروك للاهلى
ما اهو احنا محتاجين اى مكسب نفرح بيه والسلام من قله المكاسب فى حياتنا

تحياتى

kaind man يقول...

من مصلحة النظام ان يكون الشعب مغييب لا يهتم بثرواتة التى تباع وتوزيعها كبطاقات التموين تخيل معى لو ان هذه الجماهيير العريضة خرجة للمطالبة او التضامن مع اى من القضايا الرائ العام كييف سيكون حال البلد والنظام
كلمة اخيرا حلال فينا اللى بعيملوة حسنى مبارك طالما فينا من يخرجون للتشجيع والهتاف من اجل نادى على يخرجوة للهتاف والمطالبة بحقوقنا وكرامتنا المسلوبة

la core de la mur يقول...

السلام عليكم ورحمه الله وبركاته
وسورى ع هجومى اللى كان عامل زى التتار قبل ما اعرف التوبيك بيقول ايه
قولت الى ف نفسى
واالى متغاظه منه
واللى بكتمه ف قلبى اااااااااااااه يانى
الشعب صدق ما قى عايز يفرح اهه متعلق بقشه ولكن
انا ملاحظه انه مش بيعبر عن فرح
بيعبر عن فعلا كبت وغيظ وحقد دفين
بدل ما يطلعه ف حاجه بجد تستاهل
بيطلعه ف الصوره دى
طبعا انت هتقولى
لازم الامن يفرح من الشعب ياعنى
اصله مش يعرف الشعب غير ف الفرحه
انما لو واحده من المظاهرات الحمراء دى راحت غزه ولا زى يوم سته ابريل
ياسلام تتقلب الارض كلها وتنشق
عشان القبض ع هولاء القله المندسه
ااااااااااااااه يانى
حرام بجد
طاقه شباب تفنى كده
اما ف اى رقص بلا اى معنى ومش بحب الرجاله اللى ترقص بلا مسخره
واما تطلع ف صوره قله ادب ومعاكسات ف دى الامن عادى يعديها
انما لو طلعت ف صوره دعوه ولا نهضه ولا اعمار
واقصها قول حق عند سلطان جائر
تتقلب الايه ويبقوا ناس وحشه
اهئ اهئ اهئ اهئ انا مضايقه

قوس قزح يقول...

مبروك للاهلى
و يارب دايما كده نرفع راس بلدنا فى مجالات تانية

و فعلا بقى حقيقة ان الناس مفتقدة الضحك و الفرح و ما بتصدق تخرج شحنة الكبت اللى جواها بدون ما تكون خايفة ان حد يحاسبها

بس بردو لا يمنع ان اسلوب الاحتفال بالطريقة دى فيه بعض الهمجية زى النار اللى بيولعها فى سلك و يلفوه فى ايديهم
و العبوات اللى بيرشوا منها و يولعوا فى الرش بتاعها
ولا توقيفم للعربيات و اصرارهم ان العربية تعمل كلاكس و الا ميعدوهاش
تصرفات بصراحة لا تدل الا عن كبت و جهل و همجية

معلش يا شوكت من خرج من مصطبته جاب الحق عليه

حزينه يقول...

انا مبسوطه اوى اوى للاهلى

بجد احلى فوز

مبروك علينا


حزينه

واحدة مفروسة يقول...

ايه؟
هوه انت مش اهلاوي ولا إييييييييه؟؟؟؟؟
البوست ده بيوحي انك زملكاوي....اه....فيه غل كده ....
اما الشعب الل يستاهل الحرررررررررية
على رأي نهر الحب انت واحد منهم
يعنى معانا معانا مالكش مخرج
هههههههههههه

و بعدين اول زيارة لمدونة مفروسة لازمن يكون معاك وردة
قفص برتقال
قفص عم يوسف افندي
مش تدخل ..تقول انك حتفرسني
هوهوهوووووووووووو
انت لسة جديد فى المدينة واضح

مفروسة بتتفرس برة
و تدخل تفرسكم جوه فى مدينة البلوجرية
ههههههههههه


و بعدين افرح يا عمونا
و لا انت مالكش فيه؟؟؟

اقصوصه يقول...

غريبه ان رجال الشرطه

رغم تواجدهم فالموقع

ما كان لهم اي ردة فعل

مع انهم بالمظاهرات الاخرى اسود!

ما علينا!

مبروك فوز الاهلي

وعقبال الزمالك يا رب

لووووووووووووول

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا

retag يقول...

بما ان الحلوين اللى علقوا قبلى خلصوا كل الكلام عن موقف الامن اللى اظهر عنصريته فى حدته مع المتظاهرين وحنيته مع المشجعين فخلاص انا هقلب على نقطة تانية سمعت ناس كتير بتتكلم فيها
ادارة النادى الاهلى
افضل نظام ادارى مستقل فى مصر
والنتيجة
الاهلى عمال يأخد بطولات ودورى عام وسوبر ويسافر اليابان ويروح كأس عالم .. وده طبعا مش لان ابوتريكة بركة وبركات قلبه ابيض !!
لا .. لان فى اهداف واضحة .. قوانين صارمة وجادة لتحقيق الاهداف ديه .. فريق ملتزم اخلاقيا وسلوكيا وعارف مسئوليته .. ادارة على درجة عالية من الخبرة .. مفيش فساد مفيش تزويرانتخابات مجلس ادارة ....

جنوب افريقيا لما حبت تعمل دعايا ليها علشان كأس العالم 2010 قالت عندنا فريق مصرى فى القارة عالى المستوى وحقق بطولات كتير اسمه الاهلى

يبقى اللعبة كلها فى النظام _
السيستم يعنى مش النظام التانى -
المصريين اللى موجودين فى النادى ده هم هم المصريين اللى برة
لكن ليه دول ناجحين ومنظمين والتانيين لا ؟؟
على راى اللى قال : ارسملى خط وانا امشى عليه ..
ووالله هنمشى
مدام خط مستقيم وواضح مفهوش ظلم ولا فساد واللى يخرج عنه هو الخسران

مبروك للاهلى الف مبروك
ولو عرفنا ننشر ادارة الاهلى لكل الادارات المصرية اكيد هنتغير كتير اوى
ويومها يمكن نخرج للاحتفال بنصر اكبر واهم وهو نصر بلادنا ..
كان حلمًا فخاطرًا فاحتمالاً *** ثم اصبح حقيقة لا خيالا

وعلى كل حال انا مش مستخصرة فى نفسى شوية الفرحة اللى فرحتها
ديه اجمل ما فيها العشق والمعشقة
وانا بعشق البلد دى


مصطبطك جميلة يا شوكت باشا

المـــفـــــــقــــــــوعـــــة مــرارتـهــا يقول...

الحكومة هنا لازم تتفرج بس لأن الكورة هي افيون الشعوب ذي مابيقولوا ومن مصلحة حكومتنا ان الشعب يفضل مدروخ بأفيونه علي طول عشان مايصحصحش لعمايلها

noha يقول...

:)

عندك حق فعلا دى المناسبات الوحيدة
اللى ممكن فيها الشعب يفرح بجد

ويعبر عن فرحته ..!!

بس بجد انا فرحانه يمكن انا اهلوية بالوراثة
ومش متعصبه ومش بفهم فى الكورة قد كدا
بس انا فعلا فرحت يومها :)

خصوصا وان الاهلى كان بيمثل مصر
وبالتالى انا بستهوينى جدا فكرة الانتماء


تحياتى لك ولمصطبتك :)

دعاء مواجهات يقول...

مصطبتك حلوة اوى ومريحه

الواحد كانه قاعد ع مصطبة بيتو

اسعدنى التواجد هنا

ةالتةاصل ايضا يسعدنى

بيس