الاثنين، 15 ديسمبر، 2008

عبرة من بلاد الأغريق





بعد اللحمة و الحوسة والفرحة و التنطيط في العيد و تجميع العيديات اتجمعنا تاني على مصطبتنا بعد ما سبناها اليومين دول ... يعني كل واحد كان في بلده مع اهله و احبابه ... و الشوق رجعنا تاني للمصطبة ..... طبعا بعد غياب طويل التراب ملا الحتة و الزينة اللي كنا معلقينها ............ هو انا هالبخكم معايا ليه ..هندخل في الموضوع على طول

شوكت : منورين يا جماعة في المصطبة

وجدي : والله يا شوكت العيد ما يحلاش الا ما نختمه بالمصطبة

شادي : طبعا هو فيه احسن من اللمة و الصحبة الحلوة

حسين : ايه يا عم هو هنحب في بعض .. يالا حد يفتح موضوع

نادر : نتكلم في ايه ؟؟؟؟!!!!!!!!!!!

شوكت : حد فيكم شاف اللي حصل في اليونان ؟؟؟؟؟؟؟؟؟؟؟

وجدي : ايه اللي حصل ؟؟؟

شادي انت ما شفتش و ما سمعتش ايه يا عم الغيبوبة .. اثينا و 10 مدن اخرى في اليونان كانوا في اضرابت و اعتصامات و احتجاجات و مظاهرات و .....
حسين : ليه كل ده ...؟؟؟؟

نادر : انا سمعت...ان السبب ان فيه شاب في 15 من عمره اتقتل على يد شرطي ... بدون سبب و لا وجه حق

حسين : شفت الشباب و هم بيجطوا اكاليل الزهور و الشموع على حائط لوحٌ لترك الكلمات والرسائل: إنه المكان الذي سقط فيه الفتى أليكسيس غريغوروبولوس " اسم الفتى " يوم السبت الماضي على يد أحد أفراد جهاز خاص تابع للشرطة

.شوكت : غير ثم ما لبث الغضب أن تطور إلى احتجاجات عمت البلاد كلها فقادت الأحزاب والنقابات وجميع هياكل المجتمع المدني إلى مواجهة ساخنة مع الحكومة ليتحول الغضب على الدم المراق إلى ثأر لكرامة الشعب اليوناني.

وجدي : ياااه كل ده حصل في بلاد الأغريق

شوكت : انتم عارفين انا فتحت الموضوع ده ليه ؟

شادي : ليه ؟

شوكت : لأن الموضوع ادهشني ... علشان كرامة شاب يوناني اتهدر دمه بغير حق ... الشعب كله اتنفض .... لكن انت لو باصيت لحالنا في مصر... هتلاقي ان ان عندنا ازمات في جميع المجالات و الشعب ساكت .. ارتفاع اسعار والشعب ساكت .. حالة الطوارئ و الشعب ساكت .. تعذيب في مقار الشرطة تصل لحد القتل و الشعب ساكت .. مش عارف انتى يتحرك و يتنفض و يثور على الأوضاع و يقول لا
لازم شعبنا يتغلب على السلبية و اليأس و الأحباط و الخوف و اللامبالة .. العيب مش في الحكومة و لا في الرئيس .. العيب في الشعب اللس ساكت و خايف وقديما قالوا " يا فرعون ايه اللي فرعنك ..قال لم اجد احد يردني " و الأية الكريمة التي حدثت عن فرعون و اقومه " فاستخف قومه فأطاعوه انهم قوم فاسقين" فالغاية امتى نسكت و نتذل و لا نقول لا


فواصل
1 -ما حدث مع بوش في العراق هو مجرد تعبير عن ما يجيش في صدر اكثر من مليار فرد في العالم

2 - ليس لنا الحق في التعليق على أحكام القضاء .. لكن قلبي و دموعي تنزف الما لضحايا المجلة الذين حوكم عليهم اليوم .

3 قالوا رايهم:

~*§¦§ Appy §¦§*~ يقول...

يا حج شوكت ازيك
بص بقى الاغريق او الناس اللى بنتكلم عنهم عندهم ثقافه اسمها ازاى تعترض انما بصراحه وقفتنا حتى الاحتجاجيه كلها همجيه وهطل وبهدله بص لمنظرهم بزمتك وبص لمنظرنا فى الحاجات دى

smraa alnil يقول...

امممممممممم

بالنسبة لليونان

عندهم مبدأ وشرف

انما احنا يا ابني اصحاب مرض

بالنسبة بقي امتي هنفوق من اللي احنا فيه

فاكيد مش الجيل بتاعنا

واحب اقولك برضه ولا هيبقي في جيل عيالنا

يمكن يبقي في جيل احفادنا
وهما بيلعنوا فينا علي سكوتنا من قرن

ثائره يقول...

عندك حق
لعنا مهما لعنا فى الحكومه الحقيره
لكن برضه نيجى عند حد ونقول ستوب ايه اللى وقف دول لحد ما ده يحصل

للاسف الشعب انحدر باعلام فاسد اوكيه
لكن برضه ساب نفسه ينحدر

اول مره اشوف حد يضربنى بسكينه
وافضل ساكت ليه واقوله اضرب
اضراب
اضرب